Дзякуючы раённаму Савету дэпутатаў стала добрай традыцыяй у аграгарадках і вёсках раёна праводзіць святы вёсак. Гэта не толькі нагода сустрэцца з сябрамі, аднавяскоўцамі, але і магчымасць захаваць сувязь са сваёй малой радзімай, адрадзіць традыцыі вясковых святаў, перадаць іх эстафету маладым вяскоўцам.

У кожнага населенага пункта на карце нашай Валожыншчыны ёсць свая біяграфія, уласная гісторыя, захаванне якой мае патрэбу не толькі ў старонках летапісу і музейных экспазіцыях, але і ў жывых зносінах людзей розных пакаленняў, якія нарадзіліся на гэтай зямлі, ведаюць яе патаемныя месцы, сваёй працай і творчасцю праслаўляюць любы куточак малой радзімы.

Прызнацца ў любові да мястэчка, дзе нарадзіўся і вырас, да таго куточка роднай зямлі, які даў пуцёўку ў далейшае жыццё, ёсць магчымасць у кожнага, хто лічыць сабе багданаўцам. Завітайце на свята ў Багданава, каб адчуць повязь часоў і наталіць душу, а таксама, каб павесяліцца, паслухаць прыгожыя песні і, безумоўна ж, адпачыць!

Па добрай традыцыі на свяце вёскі Багданава будуць ушанаваны лепшыя работнікі – ветэраны працы, адзначаны самы старэйшы і самы маленькі жыхары, сямейныя пары-юбіляры, вызначаны лепшы падворак. Будуць працаваць выставы народных майстроў.

Прыязджайце-прыходзьце – будзе весела і цікава!