У памяшканні народнага аб’яднання народных майстроў “Скарбніца” праходзіць выстава “У творчасці няма ўзросту” Станіславы Пятруцкай.
Станіславу Іосіфаўну з яе саламянымі вырабамі добра ведаюць як у раёне, так і за яго межамі. Майстрыха ўдзельнічала не толькі ў шматлікіх выставах, але і ў раённых, абласных конкурсах “Саламяныя дзівосы”, “Саламяны цуд”, рэспубліканскім фестывалі сямейнай творчасці і інш. Вырабленыя ёй рэчы адрозніваюцца непаўторнасцю, высокай якасцю і прыгажосцю.
![](https://valozhin.by/wp-content/uploads/2023/02/img_3015-sajt.jpg)
![](https://valozhin.by/wp-content/uploads/2023/02/img_3009-sajt.jpg)
![](https://valozhin.by/wp-content/uploads/2023/02/img_3017-sajt.jpg)
Жанчына нарадзілася ў далёкім 1934 годзе ў вёсцы Войштавічы Валожынскага раёна. У мінулым годзе яна адзначыла 88-годдзе, але, нягледзячы на такі паважаны ўзрост, без справы не сядзіць – займаецца саломапляценнем, канструяваннем з пластыкавых трубачак і паперы, вязаннем на прутках і шыдлоўкам. Пачатковыя навыкі яна пераняла ў дзяцінстве ад бацькоў, а пасля на працягу ўсяго жыцця ўдасканальвала іх. Цяпер Станіслава Іосіфаўна з’яўляецца таленавітым майстрам па саломапляценні.
![](https://valozhin.by/wp-content/uploads/2023/02/img_3083-sajt.jpg)
У свой час наша гераіня закончыла тэхнікум механізацыі сельскай гаспадаркі, але займалася больш выкладчыцкай дзейнасцю. Шмат гадоў працавала ў агульнаадукацыйнай школе. Пазней рамяству саломапляцення вучыла дзяцей у цэнтры дзіцячай творчасці і Чэхаўшчынскай дапаможнай школе-інтэрнаце.
Разнастайнасць саламяных вырабаў на выставе ўражвае. Мноства павукоў, абярэгі, шкатулкі, вазы, дэкаратыўныя кветкі, капелюшы, самавар, аб’ёмныя фігуркі, лялькі ў саламяных уборах затрымліваюць на сабе позірк. Адмысловыя залацістыя рэчы нібы ўтрымліваюць гарачыню сонца, спеласць жытнёвай нівы, цяпло чалавечых рук.
![](https://valozhin.by/wp-content/uploads/2023/02/img_3129-sajt.jpg)
![](https://valozhin.by/wp-content/uploads/2023/02/img_3133-sajt.jpg)
Падчас адкрыцця выставы Станіслава Пятруцкая расказала пра ўласны жыццёвы шлях, сваё захапленне саломкай, пра рэчы, прадстаўленыя на выставе. Метадыст народнага аб’яднання народных майстроў “Скарбніца” Таццяна Кісель правяла майстар-клас па вырабе элементаў саламянага павука.
20 лютага 2020 года беларускія мастацкія практыкі саломапляцення як адметная праява нематэрыяльнай культурнай спадчыны ўключаны ў Дзяржаўны спіс гісторыка-культурных каштоўнасцей Рэспублікі Беларусь. А 1 снежня мінулага года саломапляценне Беларусі ўключана ў Рэпрэзентацыйны спіс нематэрыяльнай культурнай спадчыны ЮНЕСКА, куды ўжо ўваходзілі беларускія абрады “Калядныя цары” і “Юр’еўскі карагод”, Будслаўскі фэст і традыцыі бортніцтва.
Анжэла РАДЫНА,
фота аўтара