Залаты медаль на міжнароднай выставе “Прадэкспа-2023” у Маскве атрымала мясная кансерва, якая выпускаецца ў таварыстве з абмежаванай адказнасцю “Тэраміт-Агра”, што ў аграгарадку Бабровічы.

Юбілейная, 30-я выстава праходзіла з 6 па 10 лютага ў “Экспацэнтры”, што на Краснай
Прэсне. Нягледзячы на санкцыйны ціск, сёлета ў ёй прымалі ўдзел больш за 2000 кампаній з 35 краін, у тым ліку з Бразіліі, Ірана, Непала, Перу, Партугаліі, Сербіі, Турцыі, Францыі, Швейцарыі і Шры-Ланкі. Беларусь арганізавала нацыянальную экспазіцыю, дзе праводзілася дэгустацыя прадуктаў айчынных прадпрыемстваў.

Выстава “Прадэкспа” праводзіцца пры садзейнічанні Міністэрства сельскай гаспадаркі Расійскай Федэрацыі і кіраўніцтва Масквы пад патранатам Гандлёва-прамысловай палаты. Яна ўваходзіць у дзясятку буйнейшых у Расіі і Усходняй Еўропе, з’яўляецца адной з самых маштабных і аўтарытэтных падзей у сферы харчавання, напіткаў, тэхналогій і рашэнняў і вызначае вектар развіцця расійскай харчовай індустрыі. Яна не толькі адкрывае для спажыўцоў якасныя прадукты харчавання, але і садзейнічае прасоўванню, росту і развіццю харчовага рынку.

Як адзначыў выконваючы абавязкі дырэктара ТАА “Тэраміт-Агра” Уладзімір Круглік, валожынскія вытворцы прадставілі на расійскую выставу тры пазіцыі мясных кансерваў: свініну, ялавічыну і навінку – тушонку з курыцы. Перамогу ў конкурсе “Інавацыйны прадукт” атрымала “Ялавічына тушаная ў сваім саку” ў намінацыі “Інавацыя ў тэхналогіі”.

Вынікі выставы “Прадэкспа-2023”
• 2032 кампаніі з 35 краін свету
• 30 тэматычных салонаў
• 67753 унікальныя наведвальнікі з 106 краін
• 98342 квадратныя метры – агульная плошча выставы

– Пра тое, што атрымаем залаты медаль, – нават і не марылі. Хаця нашы мясныя кансервы насамрэч смачныя і якасныя – рыхтуюцца строга па дзяржаўным стандарце, які пацвярджае, што прадукцыя прайшла праверку і адпавядае ўсім патрабаванням бяспекі. Напрыклад, у той жа тушонцы з ялавічыны ўтрымліваецца 97,5 працэнта кускавога мяса плюс выдатнае спалучэнне невялікай колькасці спецый – солі, цыбулі, чорнага молатага перцу і лаўровага лісту, – расказаў Уладзімір Уладзіміравіч. – Перамога на такім высокім узроўні дае магчымасць заключаць кантракты з буйнымі расійскімі кампаніямі – гандлёвай сеткай “Пяцёрачка”, “Ваенгадлем”.

Будаўніцтва прадпрыемства пачалося ў 2014 годзе. У снежні 2015 года яго ўвялі ў эксплуатацыю і пачалі работу. Напачатку займаліся вытворчасцю мясных паўфабрыкатаў – у асноўным з ялавічыны, кураціны. Прадукцыя пастаўлялася ў дзіцячыя школы і сады, бальніцы Мінскай вобласці, на камбінат “Вітамінхарчавання”. Працавалі са многімі беларускімі заводамі – рыхтавалі сыравіну для Брэсцкага, Ваўкавыскага, Слуцкага мясакамбінатаў. Паўтара года перапрафіляваліся і абсталявалі тут кансервавы цэх – пачалі выпускаць гатовую прадукцыю з ялавічыны і свініны з паглыбленай пера- і тэрмаапрацоўкай. На сёння на прадпрыемстве працуюць 25 чалавек. Магутнасць вытворчасці складае ад 20 да 25 тысяч бляшанак за змену.

Мясныя кансервы актыўна набываюць буйныя гандлёвыя сеткі – “Еўрагандаль”, “Карона”, “Капеечка”, “Дабрацэн”, наладжаны аптовыя пастаўкі на фірмы Расійскай Федэрацыі.

Алена ЗАЛЕСКАЯ
Фота Сяргея БОБРЫКА